نانسي إبراهيم.. تكتب: ضد النسيان

من يوم ما بنتولد لحد ما نموت فيه كتير من حاجات بتحدد هويتنا وتتكلم عننا وتقول أحنا مين! ساعات بتكون ملامح واضحة في شخصيتنا وساعات بتكون شوية تفاصيل ملحوظة في وشوشنا وضحكتنا وحزننا بس أهمهم بصمة أيدينا.. حتى أكبر الشركات واحدة من أهم عناصر الأمان في منتجاتها هي البصمة!

لكن كل اللي فات رايح وزايل في حاجات تانية بتخلي البني أدم ضد النسيان وهي بصمة وجوده في الحياة هي روحه اللي ما بتمشيش.. هي الدعوة الحلوة اللي بتفضل تدعي ليه بيها لما تفتكره أو الضحكة الحلوة اللي بنضحكها على ذكرياته.. هي كل خطوة خطاها في طريق لمشوار ينفع بيه نفسه أو ينفع بيه غيره.. أحنا كلنا فكرة قيد التنفيذ يا تتنفذ صح وتبقي مشروع موجود مدي الحياة يا تفضل فكرة تروح وتيجي أو تروح وماتجيش تاني!

يقولك تعرف فلان؟ تقوله اه! يقولك عاشرته تقوله: لا يقولك تبقي ماتعرفهوش!

مش شرط تكن أحسن واحد في الدنيا بس شرط تكن أحسن واحد في دنيتك أنت.. لازم تستعمل معطياتك كلها متستهونش بالتفاصيل عشان تبقي موجود ومأثر يمكن تكون في يوم كلمة يستشهد بيها غيرك في موقف ويمكن تكون دليل نور يرشد غيرك أو حتى تكون عصاية تتعكز بيها روح تانية مش قادرة تقف في مهب الحياة.

خايفين دايما من حاجة كبيرة أو صغيرة كل واحد وعنده مخاوفه بس كلنا خايفين من بكره مع أن بكرة أصلا مش بتاعنا طالما بصمتنا لسه مدخلتش فيه! ولا يمكن نكون خايفين أننا مش جاهزين لبكره مع أن مفيش حاجة تمنعنا نجهز! أنا لا بحاول أكن عميقة ولا بحاول أعمل فيها قاضي أنا بصمة خايفه بستقوي بيكم أنا رافضة أكون مشروع مش ها يتنفذ.

كلنا رافضين نكون تابع وفي نفس الوقت مش بنعرف نقود متواكلين دايما على بكرة ولو بكرة جيه وجاب معاه اللي مش عايزينه بنقول ليه وعملنا ايه لكل ده؟ وأننا مسيرين مش مخيرين… طيب أزاي وأنت وأنا وكلنا عندنا طريقين يا أبيض يا أسود محدش زقك علي الأسود ومحدش أخده على الأبيض! الوحش دايما من عندنا أحنا عشان دا نتيجة اختياراتنا أحنا! يا نختار نكون جبل راسي في حياة اللي حوالينا يا نختار نكون ذرة رمل تتطير مع عاصفة النسيان!

لا قعادنا أيدينا تحت خدنا هيشفع لنا في خط النهاية ولا سعينا في طرق غلط هيدعملنا موقفنا مش ينفعنا غير نعقلها ونتوكل على الله لأننا أتخلقنا عشان نكون خلفائه بتعميرنا وبصمتنا مش موجودين عشان تكون ذكرانا كام صورة ولا كام موضة ولايك وتحبيشه قعدات غرقانه في قولنا وقالوا!

متخافش من اللي أكيد جاي خاف من اللي ممكن ما يجيش! متخافش ماتكونش جاهز خاف لو كان في أيديك تجهز وما جهزتش!

تعليقات
جاري التحميل...

حقوق النشر والتصميم محفوظة لشركة هاشتاج مصر © 2020

Social Media Auto Publish Powered By : XYZScripts.com