مايسة رضا.. تكتب: ناس وسطنا.. زواحف ومفصليات

لقيت نفسي فجأه في جروب اسمه زواحف ومفصليات الوطن العربي، ولان أكتر حاجة بخاف من إسمها وشكلها طول عمري الزواحف وبالذات الثعابين والعقارب وكنت دايما أدعي ربنا إني ما اشوفهمش حقيقة ولا حلم.

قولت مفيش مشكلة أخد فكرة ومعلومة وخاصة ان أصحاب الجروب علماء متخصصين 

وكانت النتيجة الأتي:

لقيت كل معلوماتي إن كل التعابين قرصتها سامه وأغلبها بيموت.. طلع غلط

ناس كتير في كل انحاء العالم بيلاقوا تعابين وبيقتلوها أو ساعات يصوروها قبل هروبها ومن العلماء اللي بيردوا اكتشفت ان اغلب التعابين غير سام ومن الأفضل نسيبها تعدي بسلام لأنها غير مؤذية بطبيعة خالقها وأخطرها الطريشة أو الكوبرا ودول لهم شكلهم المميز اللي محدش بيغلط فيهم.

ولقيت أن العقارب كمان أغلبها مش سام والأسود منها صاحب الأطراف الدقيقه فقط هو الأخطر على الإطلاق..

ويوجد نوع عناكب إذا ظهر معناه إنه موجود علشان يتغذى على أخطر أنواع العقارب السامة ووجوده علامة ودليل على خطر فبلاش نقتله لأنه بيحمينا.

الأبراص.. ظهورها معناه انهم بيتغذوا على حشرات ممكن تكون مؤذية ودا مؤشر لصاحب المكان أنه ينتبه لتأمين نفسه

من كل اللي فات اكتشفت أن عالم الزواحف مش مرعب زي ما كنت فاكره.. دا ربنا خلقه بقوانين وأدوار محسوبه.. وظهور بعضهم غير المؤذي لنا واللي ساعات بنقتله بجهلنا دليل على وجود نوع أخطر وقاتل بالنسبه لنا.

لقيت أن مجرد صورة الكائن الحي بنعرف نحكم على مدى ندرته ومدي خطورته.. وفجأه فكرت في بني البشر.. ليه مش من صورة بنعرف نحكم على شخص؟

ليه بعض البشر مالهاش طريقة واضحة لسلوكها دا التعبان والعقرب أصحاب السمعة السيئة ما بيعملوهاش؟!

ليه ناس كويسة وجودها بيكون أمان لنا بجهلنا ممكن نخسرهم ونلاقي نفسنا في مواجهات مع ناس أخطر؟

ليه مالناش تصنيف زي العقارب والتعابين وبقيه الخلق في الخطورة على بعض؟

هل العقل اللي ربنا كرمنا به استخدمناه في تضليل وتشتيت بعض؟

ليه اخدنا من الزواحف صفات أسوأ انواعها واخطرهم وما اتعلمناش منهم وضوح السلوك؟

ليه إحنا مبوظين سمعة العقارب والتعابين وفيه مننا الأخطر منهم.. أخر الكلام كنت بنزعج لما أعرف أن فيه ناس عندهم هواية تربية التعابين.. بس بعد اللي فات عرفت أنهم هما اكتر ناس فاهمين اللي فيها.. لأن التعبان والعقرب مش أخطر الكائنات.. حوالينا حاجات أخطر منهم.. شكرًا جروب زواحف ومفصليات.

تعليقات
جاري التحميل...

حقوق النشر والتصميم محفوظة لشركة هاشتاج مصر © 2019

Social Media Auto Publish Powered By : XYZScripts.com