طبيب التجميل كرم علام.. يكتب: الموسيقي خبير الجمجمة

كل منابع للفيلم الأمريكي الشهير والإنساني Wonder بطولة جوليا روبرتس يمكن عرف الحالة المرضية لإبنها بطل الفيلم وإسمها متلازمة تريتشر كولينز، أو خلل تكون عظام الوجه والفكين ودا مرض وراثي ناتج عن جين سائد بيصيب 1 من أصل حوالي 50000 شخص ويسبب إضطراب في نمو وتطور العظام والأنسجة الرخوة في الوجه.  المرض ده ممكن يصيب الأطفال بشكل وراثي لو أحد الأبوين عنده نفس المشكلة أو نتيجة لطفرات جديدة في الجينات عند الطفل.

من أهم الأعراض ضمور أو تشوهات الأذن الخارجية والفك السفلي وإنسداد التنفس وغياب أو ضمور عظام الوجنة (الخد) وشق سقف الحلق وضعف أو فقدان السمع وغيرها، وتعتبر متلازمة تريتشر كولينز تحدي صعب جدا في الإصلاح ويحتاج مراحل جراحية كتير في مراحل عمرية مختلفة.

دكتور فرانسيس سميث واحد من المصابين بمتلازمة تريتشر كولينز الوراثية اللي كانت السبب في تخلي والديه عنه بعد الولادة مباشرة فعاش طفولة قاسية وواجه العالم كله بوجه مختلف بلا أذنين ولا عظام وجنات وضمور شديد في الفك السفلي والحجرات العظمية للعينين وضمور في أنسجة الوجه وأجرى كتير من العمليات الجراحية المعقدة.

الطفل صاحب الوجه المختلف ده تحدى قسوة الظروف ومضايقة وسخرية الأطفال في المدرسة اللي وصفها بأنها أقسى فترات حياته وتفوق في دراسته ودخل الجامعة ودرس الطب وأتقن – رغم ضعف سمعه – العزف على البيانو والكمان، واستمر في دراساته العليا للطب وحصل على الماجستير من لندن وعلى الدكتوراة من جامعة كاليفورنيا سان فرانسيسكو واستمر في دراسات ما بعد الدكتوراة في جامعة كالجاري في كندا وجامعة كلورادوا بأمريكا وأصبح واحد من خبراء عظام الوجه والجمجمة المتميزين وأسموه خبير الجمجمة skull expert ومستمر في تحدي المرض في المعمل وفي الحياة وأمنيته أن الكل يتعايش بدون تمييز ضد وجه مختلف وإنه يقدر يساعد في وقف انتقال المرض الوراثي ده من جيل إلى جيل.

تعليقات
جاري التحميل...

حقوق النشر والتصميم محفوظة لشركة هاشتاج مصر © 2019

Social Media Auto Publish Powered By : XYZScripts.com