حسام شوقي.. يكتب: صباح السبت

صباح السبت 
وأول ذكري شهريه ليوم ما اتسبت 
شعوري غريب 
ويمكن ده
 لإني طول العمر متعود انا اللي بسيب 
مفيش ولا واحده قبليها خلت بيا 
بحب حياتي حريه 
بدون تقييد بدون تعقيد 
وقبل ما بنهي مع واحده 
بكون داخل ف حب جديد 
تملي ببقي انا الراحل وانا الناهي وانا الزهقان 
وبزهد فاللي يعشقني وعمري ما انام  فيوم ندمان  
معاها الوضع ليه مقلوب 
ده انا اتعودت ابات غالب يجيلي اليوم ابات مغلوب؟  
في ايه خلاني انا اللي بدوب وعذبني 
مكنتش لحظه بتخيل بإن فراقها يتعبني 
وكنت بقول مسيرها تاخد الدوره وحزهق منها وانساها 
واتاري دخلت دوامه وشكلي غرقت جواها
واديني لوحدي قلبي حزين 
كأن الكون بعتهالي تخلص ذنب ناس تانيين
واجرب نفس احساسهم وادوق النار 
واشوف تأثير قرار مني وحب انا كنت واخده هزار 
ولما  عرفت احساسهم بجد تعبت 
وبعد ماكنت أحب كتير
وبصحي ناسي اساميهم 
اديني صبحت زييهم
ومش بنسي صباح السبت 
وأول ذكري شهريه ليوم ما اتسبت
Comments
Loading...