إيناس كمال العربي.. تكتب: تُمن كيلو بسطرمة

الأسعار بقت غالية أوى وكل حاجة تمنها زاد والناس بقت محتاجة ترتب أولوياتها عشرين مرة قبل ما تفكر تاخد قرار جرىء متهور زى قرار الشراء! خصوصا لو حنشترى أى رفاهيات زي لبس أو اكسسورات والذى منه.

دانا ساعات بطلب الاوردر اللي عاجبنى وأسال صحباتى اختار دى ولا دى وأضيع وقت وطاقة كتير أوى!! وتيجى بقى اللحظة الحاسمة ((لحظة تأكيد الأوردر)) واطلب اللى أنا عايزاه ابقى نفسى تقولى معلش والله مقاسك خلص أو آخر قطعة اتحجزت! وياسلام بقى لما تقولى..  بس حاحاول ألاقيهولك ماتزعليش والله.. ((يا ستى وحق مين جمعنا من غير معاد أون لاين.. أنتِ حتستغربى لما تعرفى إنى فرحت أوى إنه مش متاح ودعتلك بظهر الغيب)).. دى حالة نفسية دى وللا إيه.. الظاهر كده.. المهم إحنا أحسن حاجة نصرف نظر عن موضوع اللبس دا اللى مضيع كل فلوسنا على الفاضى وموتر اعصابنا وميزانيتنا والصرف كله يبقى على الأكل بقى وماطرح مايسرى يمرى أن شاء الله.. بكلم السوبر ماركت ولسه بقوله ألو ياريت تبعتلى 3 علب لبن..

السوبر ماركت: حضرتك عارفة العلبة بقت ب 14جنيه

أنا: إييييييييييپيه! خلاص واحدة بس دا العلبة كبيرة أصلا!

السوبر ماركت: أوك

أنا: وعايزة علبة زيت ذرة 3 لتر

السوبر ماركت: وعندك كدة زيت ب 73جنيه

أنا: لا قلت لتر.. لتر! هو أحنا حنشربه!

السوبر ماركت: داكور

أنا: وأخيراً بقى كيسين ملوخية النوع النضيف ها لو مش أحسن نوع مش عايزة!

السوبر ماركت: لا موجود دا بقى الكيس ب7 جنية يا دكتورة!

أنا: بقولك يا كبير.. كان عندك نوع ملوخية مجهول كده كنت بحبه اوى يا ترى موجود؟! وياريت بقى معاه تمن كيلو بسطرمة متقطعة رفيع ومن أجود الأنواع لو سمحت ((إيه الدموع دى بس.. أنا قوية)).

الواحد كده مستواه حيفضل ينزل مع كل أوردر جديد.. أفتكر الحل السحرى هو فكرة الاستغناء.. محاربة الغلاء بالاستغناء.. زى ما قال الفنان أحمد ذكي.

تعليقات
جاري التحميل...

حقوق النشر والتصميم محفوظة لشركة هاشتاج مصر © 2019

Social Media Auto Publish Powered By : XYZScripts.com