إيمان داغر.. تكتب: تكات في البيت (2)

 

تكة النهاردة عن ملح الليمون ممكن محدش يعرفه أو بيستخدمة كتير.. هو مادة كيميائية اسمها حمض الستريك cetric acid ولونه أبيض زي ملح السفرة العادي بس طعمه مختلف عنه تحسي إنه معصور عليه ليمون.. سعره رخيص جدًا ومتوفر عند أي عطار.. هاعرفكم كام تكة مهمه له.

 

* لو اضفتيه في تتبيلة الفراخ واللحمة هايساعدك إنها تستوى بسرعة بس كمية بسيطة ماتزدش عن معلقه صغيرة.

 

* ممكن تضفيه مع مياه دافية وحطى رجلك فيها هاتبقي ناعمة جدًا وهايشيل الجلد الميت.

 

 * اضافته مع المسحوق في الغسالة هاينضف الغسيل وهايشيل الصدا من الغساله ومن الهدوم كمان.

 

* انقعي فيه عيون البوتاجاز لتاني ليوم وبالليفه ادعكيها بقي هاتبقي فله.

 

* “الكاتيل” لما تعمل طبقة جير من جوة إغلي فيها شوية مياه وبعدها حطي معلقة ملح الليمون وسبيه يبرد وبعدها اغسليه واشطفيه عادي.. هايبقي فله.

 

* وطبعا ماننساش ننضف به الحنفيات والسيراميك.. هيبرق.

 

* وكمان نستخدمه في تبيض وتخفيف وجع الأسنان عند استخدامه مثل المضمضة.

 

* حطي معلقه منه مع مياه في ازازة صغيرة ورجيها كويس وحطي منها على قطنه ومشيها على الجسم مش هاتلاقي ريحة عرق ابدًا.

 

* استخدميه مع الملح العادي في الأكل والتخليل هايفيدك ف التخسيس.

 

 * وكمان بنلمع به الزجاج والمرايات.

 

وبكده بحاجة واحدة من عند العطار سعرها رخيص طبختي وغسلتي ولمعتي وخللتي.. استنوني في تكات جديدة.

Comments
Loading...