إيمان داغر.. تكتب تكات: ساندوتشات المدارس

اليوم هنتكلم عن تكات لسندوتشات المدارس وأهم حاجة توفير الوقت في تحضيرها.. اشتروا لأولادكم اللانش بوكس مش اللانش باج علشان السندوتشات ماتتهرسش

نهتم دايما بتنضفها كل يوم بالغسيل بالمياة والصابون ونسيبها مفتوحة لتاني يوم علشان ماتكونش ريحة تغير طعم الأكل

نخزن في الفريز كمية نوع العيش اللي بيفضلوه بالأسبوع ويكون متغلف كويس ويطلع الصبح هايكون طازة

بلاش نقطع الفاكهة والخضار من بليل لانها بتدبل وغير أن الفاكهة ممكن لونها يسود فامش هايكلوها.

طبعا أنواع الجبن والمربي والشيكولاتة اللي بيفضلوها تكون موجودة دايما عندنا في التلاجة.

ساندوتشات المدارس

نجهز وننوع ليهم في السندوتشات علشان مايملوش ويقدروا يشبعوا لان يومهم طويل في المدرسة.

نهتم دايما اننا نديهم الڤيتامين سواء كبسولات أو شراب هايساعدهم على التركيز وده بعد ما ترجعو للدكتور الخاص بهم.

بلاش يشربوا اللبن قبل ماينزلوا.. شربوهم أي حاجه دافية غير اللبن علشان مايكسلوش انهم يبدأوا يومهم.

خلي معاهم دايما الزبادي بأى طعم هما يفضلوه ومحكم الغلق ويكون معاهم المعلقة البلاستيك الصغير استعمال مرة واحدة.

أعملي سندوتشات البيض بلاش مسلوق.. يكون أوملت وضيفي لية بشر البطاطس أو كوسة أو زيتون والملح والفلفل هايبقي أحلى.

لو باقي فراخ أو لحمة من الغدا قطعيهم شرايح أو قطع صغيرة وضيفي ليهم فلفل ألوان وشوحيهم بنقطين زيت هاتبقي أحلي واسرع شاورما.

بطاطس الشتا حلوة وخصوصا اللي قشرتها لونها أحمر قشريها وقطعيها زي الشيبسي من بليل وضيفي ليها مياة وملح والصبح حمريها مش هاتاخد وقت وهاتكون أحلي شيبسي.

الفراخ البانية والبرجر يكونوا جاهزين في الفريزر ونضيف لهم الكاتشب أو المايونيز والمستردا.

جهزوا الوافل بطريقة سهلة (كوب دقيق + بيضة +معلقتين سمن + كوب لبن + معلقة بيكنج بودر + ذرة قرفة وڤانليا) أضربيهم كويس في الخلاط وضيفي الخليط في ازازة بلاستيك علشان مانهدرش وضيفي من الازازة على الماكينة الوافل وبعد ما تستوي ضيفي عليها الشيكولاتة اوفر كتير.

تعليقات
جاري التحميل...

حقوق النشر والتصميم محفوظة لشركة هاشتاج مصر © 2019

Social Media Auto Publish Powered By : XYZScripts.com