إيمان داغر تكتب.. تكات الشتاء.. ترطيب البشرة بعد فصل الشتاء

الشتا والسقعة خلاص بيودعونا بس بعد ما سابوا علامات التشقق والجفاف على بشرتنا.

النهاردة التكات عن ترطيب البشرة بعد فصل الشتاء.

لازم الفازلين الطبيعي (البيور) يكون صدقنا وموجود دايماً في شنطتنا وسعره بسيط مش مكلف وبيكون موجود في الصيدليات.. ادهني بيه ايدك ورجلك وخصوصاً (الكعوب).

وزبدة الكاكاو لترطيب الشفايف خطوة أساسية نعملها.. لأنها أول وأكتر مكان بيظهر فيه التشققات بسرعة جداً هي الشفايف فبلاش ننساها.

ماية الورد نمشيها على بشرتنا مرتين الصبح و بليل.. هاتخلي البشرة نضرة وصافية.

وممكن نعمل أحلي ماسك من ماية الورد ومعاها الجلسرين الطبيعي.. (موجود في كل الصيدليات) وندهن بيه بشرتنا قبل النوم وادعيلي.

اصحاب البشرة الدهنية مايضفوش الجلسرين.

لو بشرتك فيها بقع غامقه أو قشر ميت وعايزة تخفيهم.. اعصري نص لمونة على معلقة بن.. هايفرق معاكي كتير قوي.

جربي الموز واللبن (٢ موزة + نص كوباية لبن) نخلي بالنا إن يكون سمكه تقيل.. هايرطب بشرتك وينعمها جداً.

وماسك الزبادى والعسل (معلقه عسل ابيض + معلقتين زبادى) هايفرق في بشرتك للأحسن كتير

ومننساش الضوافر لانها بتشقق من السقعة ومن كتر تعرضها للماية السخنة..  نستخدم ليها معلقة زيت الزيتون وعليهم نص لمونة وبالقطنة نمشيهم على ضوافرنا قبل النوم.. هاتبقي بتلمع وتقويها اكتر.

كمان ممكن تخلي بشرتك تلمع زى الاطفال.. نحط معلقتين لبن بودرة وعليه معلقة ماية الورد واعجنيهم كويس وافرديهم على بشرتك ولما ينشف افركية بهدوء واغسلي وشك بماية دافية.. ولازم  تستخدمي اللبن البودرة مش اللبن السايل لانة موجود في فيتامينات كتيرة جداً هاتفيدك وتفيد بشرتك.

اعملي حمام بخار لبشرتك مرة في الاسبوع عبارة عن آيه بقي.. ماية ونضيف فيها بقدونس اخضر ولمون وينسون وكمون وعرضي بشرتك للبخار اللي خارج منهم.. هاتساعدي بشرتك انها تتنفس وتجربة روعه بجد.

وبكدة شوية خطوات بسيطة ومكونات مش مكلفه هاترجعي لبشرتك نضارتها تاني.

واستنوني في التكات الجديدة.

تعليقات
جاري التحميل...

حقوق النشر والتصميم محفوظة لشركة هاشتاج مصر © 2019

Social Media Auto Publish Powered By : XYZScripts.com