إيمان داغر تكتب.. تكاتي الجديدة عن الشتاء (6)

البصل… 
نحاول نزود البصل فى أكلاتنا فى فصل الشتاء لأنه بيساعد كتير على تقوية الجهاز المناعى وأحلى وأقوى طعم للبصل هو (البصل الاحمر).
نقدر نضيفة للسلطة بيضيف طعم هايل ليها والأحلى ان ممكن ناكلة طازة من غير ما يدخل فى الاكل.
و كمان ما ننساش البصل الاخضر مفيد جداً.
شوربة العدس… 
خليها دايما صديقتنا مع كل انواع الاكل… بتساعد على الدفئ وبتحمينا من نزلات البرد وانت بتسوي العدس حطي معاه جزره وبطاطسايه وبصله وطماطمايه ونصف معلقه كركم واسلقي واضربي في الخلاط واعملي تقليه بالتوم والصلصه وضيفيها علي الشوربه اللي انضربت في الخلاط.. وهاتشربي أحلي شوربه عدس.
الفاكهة…. 
عندنا فى بيوتنا فى فصل الشتاء اقوى مضاد حيوى (للاحتقان) و مش بناخد بالنا منها هى آيه بقي..
(برتقال… موز… يوسفي… جوافه) تعالي بقي قطعيهم و ضفيهم ع بعض مع معلقة عسل ابيض واعصري لمونه و قلبيهم كويس و قدميهم لاولادك و ابقي ادعيلي.
الكاكاو…
طبعا اشهر مشروبات فصل الشتاء.. السحلب.. الحمص (الحلبسة).. الحلبة.. الشاى.. الينسون… الكراوية… النعناع
المشروبات دي هاتساعدك ع الدفئ والنوم.
و كمان القرفة باللبن من المشروبات المستحبة جدا فى الشتاء.
البليلة… 
هي حبوب القمح ومفيدة جداااااا (مفيدة  للذاكرة)
 هاتساعد اولادنا ع التركيز.
مفيدة للبشرة و الشعر كمان.
و غير انها بتساعد ع الدفئ.
اللمون الاخضر… 
 اللمون من اهم اصدقاء الشتاء.. مانقدرش نكمل الشتا من غير مانستخدمة فى اكلاتنا او فى المشروبات السخنة.
التفاح و القرفة… 
عصير التفاح يدوب ندفية ع النار و نضيف معاه عود قرفه و يبقي احلي مشروب للشتا و يدفي.
و طبعا مانقدرش ننسي محشي الكرنب ( وانت بتسلقي ورق الكرنب حطي في ميه السلق معلقه سكر ) والقلقاس (الحقي دلوقت وخزنيه في الفريزر) وخزني الطماطم لرمضان كمان  في الفريزر علشان رخيصه دلوقتى والبطاطا اشويها او قطعيها حلقات وحطي عليها لبن وسكر وزبيب ودخليها الفرن والف هنا.
و استنوني فى تكات جديدة
تعليقات
جاري التحميل...

حقوق النشر والتصميم محفوظة لشركة هاشتاج مصر © 2019

Social Media Auto Publish Powered By : XYZScripts.com